Friday, December 21, 2012

শূন্যতা

শূন্যতা

একোকে ভাল নালাগে আজিকালি
হৃদয়ত ফুলি থকা ৰঙীন কৃষ্ণচূড়া
ৰঙহীন হৈ গ'ল
ভাল নলগা হ'ল চাৰিআলিৰ আড্ডা
জোনাকৰ বৰষুণ
অথবা সুমঠিৰাবুলীয়া আবেলি
চিগাৰেটৰ ধোঁৱাৰ লগত
উৰি গ'ল সকলো মাদকতা
সকলো ফালে মাথো
শূন্যতা শূন্যতা শূন্যতা

২০/০৯/২০১০

আঘোণীয়া চিন্তা

আঘোণীয়া চিন্তা

আঘোণীয়া বৰষুণজাকে
বৰ আমনি কৰিছে
ধানবোৰ পথাৰতে তিয়ালে
পোনাকনৰ মাকৰ অই
নকৈছিলোনে -
বাপুৰ মাক আৰু
শাওনী পেহীক মাতি
দাই পেলা সোনকালে
পথাৰ ডৰা

বছৰটোলৈ সাঁচতীয়া ধানকেইটা
পথাৰতে গাপ লাগিলে
ঘূৰি বছৰটো কেনেকৈ কটাবি
জগতৰ দোকানত কেনেকৈ বিছাৰিম
নিমখ - তেল
ধান দিম বুলি কৈ

ধান এমোন বেচি
এইবাৰ পোনাকনকো
ইস্কুললৈ পঠাম বুলি ভাবি থৈছো
যোগেন চাৰে কৈছে -
তেওঁ  হেনো তাক
বিগগিয়ানী কৰাৰ সপোন দেখে

সেয়েহে কৈছো অ' পোনাকনৰ মাক
যেনে - তেনে আজিয়ে দাই দে
পথাৰ ডৰা
ৰঘু কাইৰ সৈতে
আনি থওঁ ঘৰলে ডাঙৰী কেইটা
উৰুখা হ'লেও
চালখনে অলপতো বচাব
আপদীয়া বৰষুণ জাকৰ পৰা

Wednesday, December 19, 2012

মে দিৱসৰ গীত

মে দিৱসৰ গীত

(পল ৰবছনৰ একে নামৰ গীতটোৰ হেমাংগ বিশ্বাসে কৰা অসমীয়া অনুবাদ। ফটো http://en.wikipedia.org ৰ পৰা।)

জন হেনৰি

জন হেনৰি
তীখাৰ আখৰে লিখা নাম তাৰ
যেন এটা চলন্ত ইঞ্জিন
হাতুৰীৰ তালে তালে গান গায় সুহুৰি দি
ৰংমনে কাম কৰে ৰাতি-দিন।

কলীয়া শিলত কটা হেনৰি
গ্ৰেনাইটেৰে গঢ়া পেশী জলমল
হাতুৰীৰ কোবে কোবে শিলে শিলে জুই জ্বলে
হাতুৰীয়ে মাথোঁ তাৰ সম্বল।

ভাৰ্জিনিয়াৰ ৰে'ল সুৰংগত
শিলৰ পাহাৰ কাটি কাটি
ৰে'ললাইন পতা হ'ব হেনৰিৰ হাতুৰীৰে
কোবে কোবে পাৰ হয় ৰাতি।

জন হেনৰিৰ চেনেহৰ লগৰী
নাম তাইৰ মেৰী মেগডেলিন
সুৰংগৰ বুকুতে কাণপাতি শুনিছিল
হেনৰিৰ হাতুৰীৰ বীণ!
বগা চৰ্দাৰক লাগে আৰু বেছি কাম
ষ্টীম ড্ৰিল কৰে আমদানি
আশংকা হেনৰিৰ যন্ত্ৰৰ ওচৰত
ল'ব নেকি পৰাজয় মানি।

'মই মেচিনৰ হ'ম প্ৰতিদ্বন্দ্বী'
জন হেনৰিয়ে কয় বুকু ডাঠি
ষ্টীম ড্ৰীলৰ লগতে হাতুৰীৰ চলে 'ৰেচ'
বিস্ময়ত কঁপি উঠে মাটি।

বগা চৰ্দাৰে কাঠ হাঁহি মাৰি
কয় 'নিগাৰ'ৰ চা অতপালি
তোৰ যদি জয় হয় নহ'ব সূৰ্যোদয়
ক'লা শিল হ'ব সোণোৱালী।

জন হেনৰিৰ হাতুৰীৰ চমকে
জিলিকায় বিজুলীৰ বান
মানুহৰ সৃষ্টি দুৰন্ত ষ্টীম ড্ৰীল
মানুহৰ হাতত হয় সৈমান।

আগ্নেয়গিৰিৰ মুখ ৰুদ্ধ
থমকিল হাতুৰীৰ শব্দ
হেনৰিৰ জয়ধ্বনি চৌপাশে যেতিয়া
হৃদপিণ্ড তাৰ স্তব্ধ
জন হেনৰিৰ কণমানি জীয়ৰী
শিলৰ বুকুৰে যেন নিজৰা
মাকৰ কোলাত বহি বাট চাই আছে কাৰ
কোনে দিব দেউতাৰ বতৰা!

মে' দিৱসৰ গানে গানে
নীলা আকাশৰ তলে দূৰ
শ্ৰমিকৰ জয়গানত কাণপাতি শুনা সৌ
হেনৰিৰ হাতুৰীৰ সুৰ।

Tuesday, December 18, 2012

তুমি আহিবা বুলি

তুমি আহিবা বুলি

অলপ আগলৈকে
আকাশ উপচি আছিল
যেনি- তেনি সিঁচৰিত হৈ আছিল
মেঘবোৰ
এতিয়া মেঘবোৰ নাই
এতিয়া আকাশ
ঠিক সাগৰৰ দৰে
নাই মাথো চঞ্চলতা

ঠিক যেন মোৰ দাম্ভিকতা
তুমি আহিবা বুলিয়ে
আকাশৰ এই গাম্ভিৰ্যতা

বিতোপন গগৈ
২৫।১১।২০১২

প্রাপ্তি

 প্রাপ্তি

আকাশতে হঠাতে আঁকি দিলো
মোৰ স্বপ্নিল কবিতাৰ শাৰী
জোনাকে লৈ গ'ল তোমাৰ কাষলে
একাজলি সেউজীয়া জোনালী
তোমাৰ আকুলতাৰ উকা দেৱালত
সি হ'ল এখন প্রাপ্তিৰ ছবি।

বাতৰি

 বাতৰি

তুমি আহিবা
তুমি আহিবা

খবৰ দি গ'ল জোনাকে আহি
খবৰ বিয়পি গ'ল
খবৰ বিয়পি গ'ল সমগ্র আকাশ জুৰি
সজীৱ হ'ল পথাৰবোৰ
অংকুৰিত হ'ল বীজবোৰ
নদীয়েদি বৈ গ'ল খবৰ
আকাশত উৰি গ'ল খবৰ

তুমি আহিবা
খবৰ শুনি চহৰ খনে
সলালে সাজ
এজাক বৰষুণে আহি
ধুই নিলে সকলো অৱসাদ
তুমি অহাৰ বাটত খিলখিলাই উঠিল
সোণাৰুৰ হালধীয়া হাঁহি
বতাহত বাজি উঠিল গান
ফুলি উঠিল বুকুৰ ফুল
গাৰুৰ তলৰ সপোনবোৰো
জাগি উঠিল
সমগ্র দেহৰ কোষে কোষে
বিয়পি গ'ল খবৰ

তুমি আহিবা
তুমি আহিবা

চিৰ বিপ্লৱী কলাগুৰু বিষ্ণু প্রসাদ ৰাভাৰ সম্পৰ্কে সপ্তম আৰু নবম শ্রেণীত পঢ়াৰ সময়ত মই লিখা দুটা কবিতা।

চিৰ বিপ্লৱী কলাগুৰু বিষ্ণু প্রসাদ ৰাভাৰ সম্পৰ্কে সপ্তম আৰু নবম শ্রেণীত পঢ়াৰ সময়ত মই লিখা দুটা কবিতা।

শিৰোনামাত বিষ্ণু ৰাভা

তোমাক যে সুধিছিল বীৰেন্দ্র কুমাৰ ভট্টই
"বিষ্ণু ৰাভা এতিয়া কিমান ৰাতি"!
তুমি উত্তৰ দিলাহেঁতেন নিশ্চয়-
এতিয়া মাজৰাতি
পুৱতি নিশালৈ আৰু বেছিপৰ নাই
তাৰ পাছত হ'ব পুৱা
অসমৰ বুকুত উদয় হ'ব
এক নতুন সূৰ্য
অসম হ'ব ধনতন্ত্রবাদ
পুঁজীবাদৰ পৰা মুক্ত।

কিন্তু হাঁয়,নিয়তিৰ যে কি পৰিহাস
পুৱতি নিশাই লৈ গ'ল তোমাক
অসমৰ উমাল বুকুৰ পৰা
বাট চাই আছো আমি
প্রীতি আৰু সমগ্র অসমে
তুমি ঘূৰি আহিবা
উদ্ধাৰিবা অসমক
পুঁজীবাদ ধনতন্ত্রবাদৰ পৰা।

চিফুং বাঁহীত আজিও বাজে
কৰুণ সুৰ
আজিও বড়ো গাভৰুৰ
নাচোনৰ তাল ভাগে
কাৰণ
অসমত আজিও
পুৱা হোৱা নাই
তুমি যে নাই...

    বিতোপন গগৈ
    সপ্তম শ্রেণী।


বিপ্লৱৰ আভা

বিপ্লৱৰ আভা সনা এটি জীৱন
হেৰাল 'অতীত অসম'ত
বিপ্লৱৰ ঔৰসত জন্মা
কমৰেড আজি নিস্তব্ধ
কোনে কয়-
'বিষ্ণু ৰাভা আজি নাই'
তুমি আছা আমাৰ বুকুৰ মাজত
বুকুত হাত দিলে শুনো
তোমাৰ মাত-
'বিপ্লৱ পথৰে যাত্রী আমি'
ক'ত যে হেৰাই গ'ল
তোমাৰ সমাজতন্ত্র
কমিউনিষ্ট ৰাভা
আজি তোমাৰ নামত
খালো আমি শপত
নাপাহঁৰো তোমাৰ বিপ্লৱৰ আভা
তুমি আমাৰ বিষ্ণু ৰাভা।

    বিতোপন গগৈ
    নবম শ্রেণী।