ফাগুন মোৰ ওপজা দিন

ফাগুন মোৰ ওপজা দিন
~~~~~~~~~~~~~~
আজি ফাগুনৰ বাৰ দিন
মোৰ ওপজা দিন
ফাগুনৰ কোলাত ওপজাৰ বাবে
মই উদাস আৰু অহংকাৰী
বুকুত বৈ থকা
দুখৰ নদী ভেটি
দুচকুত ফুলাব পাৰো জুইফুল
উদাসী ফাগুনৰ দৰেই নিৰ্লিপ্ত হ'ব পাৰো
কোনো দুখ কিম্বা সুখত
ডাৱৰৰ দৰে চঞ্চল হৈও
নেৰো আকাশৰ দাম্ভিকতা
ফাগুনৰ দৰে মইও কেতিয়াবা দুষ্ট হৈ পৰো
চুই চাব বিচাৰো
তাইৰ বুকুৰ ফুল দুপাহ
ৰু ৰু পচোৱাৰ সতে ভাহি যায়
মোৰ সেউজীয়া বাঁহীৰ সুৰ
মোৰ পিছে বদনাম নাই
ফাগুনৰ সমান
(মই শুনা নাই)
বদনাম আছে মাথো
মই দাম্ভিক
মই অহংকাৰী
ফাগুনৰ কোলাত ওপজাৰ বাবেই
মই দাম্ভিক আৰু অহংকাৰী।