সত্য

মূলঃ নাগাৰ্জুন

অনুঃ বিতোপন গগৈ

সত্যৰ পেৰালাইচিছ হৈছে

এটা প্ৰকাণ্ড কাঠৰ কুন্দাৰ দৰে

মাথো পৰি ৰয়

ওৰে দিন ওৰে ৰাতি

চকু ফালি ফালি ইফালে সিফালে

মাথো চাই ৰয়

সমুখেৰে কোনোবা অহাযোৱা কৰিলেও

সত্যৰ দৃষ্টিত কেতিয়াও একোৱে প্ৰভাৱ নপৰে

শিল দৃষ্টিৰে মাথো চাই ৰয়

ওৰে দিন ওৰে ৰাতি

সত্যৰ পেৰালাইচিছ হৈছে

ডিঙিৰ ওপৰৰ যন্ত্ৰাংশ সম্পূৰ্ণৰূপে বিকল হৈ গৈছে

চিন্তা কৰা বন্ধ

বুজা বন্ধ

মনত পেলোৱা বন্ধ

মনত ৰখা বন্ধ

মগজুৰ স্নায়ুত সামান্যও সাৰ সিকতি নাই

চামুচ ভিতৰলৈ ভৰাই দাঁতত লগাই দিব লাগে

তেতিয়াহে খাদ্য ডিঙিলৈ যায় 

ওপৰৰ যন্ত্ৰাংশ সম্পূৰ্ণৰূপে বিকল হৈ গৈছে

সত্যৰ পেৰালাইচিছ হৈছে

এটা প্ৰকাণ্ড কাঠৰ কুন্দাৰ দৰে

মাথো পৰি ৰয়

ওৰে দিন ওৰে ৰাতি

আপোনাৰ হাতত ধৰি থাকিব বহু সময়

আপোনালৈ চাই থাকিব বহু সময়

আপোনাৰ কথা শুনি থাকিব বহু সময়

এনে লাগিব যেন আপোনাক চিনি পাইছে

একেবাৰে নহয়, সত্যই আপোনাক চিনি নাপায়

চিনি পোৱা ক্ষমতা চিৰ দিনৰ বাবে লুপ্ত হৈ গৈছে

হয়, সত্যৰ পেৰালাইচিছ হৈছে

ইমাৰজেন্সীৰ শ্বক লাগিছে

এনে লাগিছে, এতিয়া একো কামৰ হৈ নাথাকিল আৰু

হয়,  সত্য এতিয়া পৰি থাকিব

মৃতদেহৰ দৰে, স্পন্দনশূন্য মঙহৰ টোপোলা হৈ!

৩০ জুন, ২০২১