গাঁৱত কোনে গুলি চলায়

মূলঃ জেচিন্তা কেৰকেট্টা

অনুঃ বিতোপন গগৈ

প্ৰতি নিশাই গাঁওখন বিচনাত পৰে

কিন্তু সেই টোপনিৰ ওচৰলৈ

এতিয়া কোনো সপোন নাহে

যোৱা নিশা সকলো সপোনক বন্দী কৰি

জেলত ভৰাই থোৱা হ'ল

য'তেই সপোনবোৰ গজি উঠাৰ সম্ভাৱনা আছিল

তাত কাঠফুলাৰ দৰে গজি উঠিছে সৈনিকৰ ছাউনি

দিন আৰু ৰাতিবোৰ আচৰিত ধৰণে সন্ত্ৰস্ত

গাঁৱৰ এটা আদিবাসী ল'ৰা

দেখিছিল কেতিয়াবা নিজৰ মাটিক সেৱা কৰাৰ সপোন

এতিয়া মাজনিশা সি সাৰ পাই উঠে

এতিয়া সপোনত দেখে সি হত্যাকাৰী বন্দুক

এতিয়া তাৰ টোপনি ভৰি আছে

বহু ভয়ানক ঘটনাৰ স্মৃতিৰে

দোভাগ ৰাতি সি সাৰ পায়

নিজৰ মুখখন মোহাৰে

এনেকুৱা লাগে যেন

কোনো বন্দুকৰ কুন্দা তাৰ কোৱাৰি ফালি সোমোৱাই  দিয়া হৈছে

আৰু তেজেৰে লুতুৰি পুতুৰি হৈ দাঁতবোৰ

তাৰ হাতত আহি পৰিছেহি

দোভাগ ৰাতি সাৰ পায়

সি নিজৰ ভৰি দুখন চুই চায়

গুলি সোমাই থকা নাইতো? 

তাৰ এতিয়া এনেকুৱা বাৰে বাৰে হয়

সিদিনা আঘাতপ্ৰাপ্ত হৈ পৰি যোৱা

আধামৰা বিৰছাক

পলোৱাত বিফল হোৱা দেখি

সেই মানুহটোৱে প্ৰথমে চৌদিশে চালে

আৰু কাকো নেদেখি মনে মনে

তেওঁৰ বুকুত তিনিটা গুলি গুজি দিলে

আনজন বিৰছা যাৰ ভৰিত গুলি লাগিছিল

উশাহ বন্ধ কৰি জাৰণিত পৰি থাকিল নিঃশব্দে

আজিও কাগজৰ টোপোলাত

সেই ভৰিৰ পৰা উলিওৱা গুলিটো লুকুৱাই

তেওঁ ঘুৰি ফুৰে অস্থিৰ চেতনাহীন হৈ—

চোৱা এইটোৱেই প্ৰমাণ

যে আচলতে কোনো গাঁৱত

সকলোতকৈ আগত কোনে গুলি চলায়?

২২ মে' ২০২১

চট্টিছগড়ত মাওবাদী বিচৰাৰ নামত আদিবাসী গাঁওবোৰত আৰক্ষী ছাউনি পাতি তেওঁলোকক অত্যাচাৰ চলোৱা হৈছে। তাৰ বিৰুদ্ধে প্ৰতিবাদ কৰা গাঁওবাসীৰ সমৰ্থনত আদিবাসী সমাজকৰ্মী, কবি Jacinta Kerkettaই এই কবিতাটো লিখিছে।