মূলঃ কিতাবগঞ্জ
অনুবাদঃ বিতোপন গগৈ
(১)
এদিন তেওঁ হাঁহিলে
আৰু মই
সকলো বন্দুকৰ কাৰখানা বন্ধ কৰি
লিপষ্টিকৰ কাৰখানা খুলি দিলো
এদিন তেওঁ অভিমান কৰিলে
আৰু মই
সকলো স্বৈৰাচাৰীক গাদীৰ পৰা নমাই দিলো
সকলো বিপ্লৱ সফল কৰি দিলো
এদিন তেওঁৰ খং উঠিলে
আৰু মই
ৰঙৰ সকলো পাৰ্থক্য মচি পেলালো
পৃথিৱীখন গুলপীয়া কৰি তুলিলো
এনেকৈয়ে প্ৰেমৰ বাবে
মই পৃথিৱীখন সলনি কৰি পেলালো!
(২)
তোমালৈ প্ৰেমৰ চিঠি লিখাৰ আগত
মই ইতিহাস পঢ়ি ল'লো
যাতে আমাৰ প্ৰেমে
শোষিতৰ দুচকুৰে নিগৰা
এটোপাল চকুলোকো আওকাণ নকৰে
যাতে মই তোমালৈ লিখা
প্ৰতিটো শব্দই
স্বৈৰাচাৰী শাসকৰ টোপনি হৰণ কৰি থাকে!
১৪ ফেব্ৰুৱাৰী, ২০২২
No comments:
Post a Comment