প্ৰতিবাদ

মূলঃ অজয় দুৰ্জ্ঞেয়

অনুঃ বিতোপন গগৈ

অ' মোৰ বন্ধু!

তুমি মোক উপদেশ দিছা যে

মই কম আক্ৰমণাত্মক হ'ব লাগে

সকলো পাহৰি যাব লাগে

সকলোকে ভাল পাব লাগে

আৰু অতীতৰ হাতোৰাৰ পৰা ওলাই আহিব লাগে।

বাৰু! মই তোমাক মাত্ৰ এইটোৱে সুধিব বিচাৰো

তোমাৰ বাবে কেতিয়াবা প্ৰগতি নিষিদ্ধ হৈছে নেকি?

তোমাৰ নিয়তি জন্ম হোৱাৰ আগতেই নিশ্চিত হৈছে নেকি?

তোমাৰ বাবে কেতিয়াবা আটাইতকৈ বেয়া গালিৰ নিৰ্মাণ হৈছে নেকি?

তুমি কেতিয়াবা হ'লেও কোনো নলা-নৰ্দমাত নামি পাইছানে?

কেতিয়াবা তোমাৰ মূৰৰ পৰা ঘাম বৈ নিতম্ব পাইছেগৈ নে?

তোমাক ভুলতে স্পৰ্শ কৰি কোনোবাই গা ধুইছেনে?

কেতিয়াবা তোমাৰ মূৰে কাৰোবাৰ মল কঢ়িয়াইছেনে?

অনিচ্ছা সত্ত্বেও টিকা ফটা ৰ'দত পথাৰত কাম কৰি পাইছানে?

কেতিয়াবা আনৰ এৰেহাৰে পেট ভৰাইছা?

মৰাৰ আগতে এবাৰ হ'লেও মৰিছা?

তোমাৰ মা-ভনী ৰাজহুৱা সম্পত্তি ঘোষিত হৈছেনে ?

তোমাৰ এটা হ'লেও প্ৰজন্ম এনেকৈ শোষিত হৈছেনে?

কেতিয়াবা তোমাৰ কোনোবা পূৰ্বপুৰুষে মুত খাই পাইছেনে?

তোমাৰ কোনোবা পূৰ্বপুৰুষে নিজৰেই থু চেলেকি পাইছেনে?

এনেকুৱা কিবা সোৱাদ তোমাৰ জিভাত লাগিছেনে?

এনে এটাও ঘৃণনীয় স্মৃতি তোমাৰ মনত আছেনে?

এতিয়া তুমি ক'বা মই পুনৰ আক্ৰমণাত্ম হৈ উঠিছো

তেন্তে ক্ষমা কৰিবা বন্ধু! মোৰ কণ্ঠ উচ্চ নহয়

মাত্ৰ তুমি নিজে এক মৌনতাত অভ্যস্ত হৈ পৰিছা

তোমাৰ কাণে প্ৰতিবাদী কণ্ঠ পাহৰি গৈছে

কিন্তু এতিয়া সিহঁতক শক্তিশালী কৰা, সাজু কৰা

কাৰণ তোমাৰ মতেই শোষিতসকল আজি আক্ৰমণাত্ম হৈ উঠিছে!

৬ জুলাই, ২০২৩