মূলঃ সাহিৰ লুধিয়ানৱী
অনুঃ বিতোপন গগৈ
হে মহান ব্যক্তিসকল
তেজ নিজৰ হওক বা আন কাৰোবাৰ
হয়তো মানুহৰেই তেজ
যুদ্ধ পূবতেই লাগক বা পশ্চিমত
ডোঙাতো বান্ধে শান্তিৰ পৃথিৱীখনৰেই তেজ
বোমা ঘৰতেই পৰক বা সীমান্তত
ঘৰৰ আত্মাবোৰেই আঘাত পায়
পথাৰবোৰ নিজৰেই জ্বলক বা আনৰ
অনাহাৰত জীৱনেই চটফটায়
টেংকবোৰ আগুৱাই যাওক বা পিছুৱায়
গৰ্ভতো পৃথিৱীৰেই বিদাৰে
জয়ৰ উল্লাসেই হওক বা পৰাজয়ৰ শোক
মৃতদেহবোৰৰ ওপৰততো জীৱনেই কান্দে
যুদ্ধতো নিজেই এক সমস্যা
যুদ্ধই কি সমস্যাৰ সমাধান দিব
জুই আৰু তেজৰ পৰা আজি বাচিলেও
ভোক আৰু দৈন্যই কাইলৈ আগুৰি ধৰিব
সেইবাবেই হে মহান ব্যক্তিসকল
যুদ্ধখন পিছুৱাই দিলেই ভাল
তোমাৰ আমাৰ সকলোৰে চোতালত
চাকিগচি জ্বলি থাকিলেই ভাল।
১৪ অক্টোবৰ, ২০২৩
No comments:
Post a Comment