মূলঃ সম্পত সৰল
অনুঃ বিতোপন গগৈ
শাসনত বহি থকা ৰজা বৰ তামাচাবাজ
প্ৰজাৰ মনোবিজ্ঞান তেওঁৰ নখদৰ্পণত।
ৰজাই জানে
জনতা ধনী দুখীয়া জ্ঞানী অজ্ঞানী যিয়েই নহওক
তামাচা কিন্তু মচগুল হৈ চায়।
তামাচাবাজীৰে প্ৰজা এবাৰ সন্মোহিত হ'লেই
ৰজা আৰু প্ৰজাৰ মাজৰ টিউনিং মজবুত হৈ যায়।
ৰজাই যদি মূৰ মাৰিবলৈও কয়
প্ৰজাই হাত তালি মাৰিবলৈ লাগি যায়।
ৰজাও কিন্তু আচৰিত তামাচাবাজ
সুশাসনৰ বাবে তেওঁ তামাচা শৈলীকে
নিজৰ কৰি লয়।
প্ৰজাই পৰিষ্কাৰ পানীৰ বাবে চিঞৰিলে
ৰজাই বোঁৱতী নদীত উৰাজাহাজ চলাই দেখুৱালে।
বস্তিত জুই লাগিলে
ৰজাই জুইৰ চকৰিৰ মাজেৰে জপিয়াই
চাৰ্কাচ দেখুৱাবলৈ লাগিলে।
প্ৰজাই মূল্যবৃদ্ধিৰ ওপৰত ধ্যান দিবলৈ ক'লে
ৰজা গুহাত সোমাই ধ্যানত বহি ল'লে।
প্ৰজাই স্কুল হস্পিতেল দাবী কৰিলে
ৰজাই প্ৰতিবেশী দেশৰ আক্ৰমণৰ ভয় দেখুৱাই
খালী বটলত ৰকেট সাজু কৰি উৰাবলৈ লাগি গ'ল।
প্ৰজাই কামৰ কথা সুধিলে
ৰজাই মনৰ কথা ক'বলৈ লাগি যায়।
ৰজাই কিন্তু জানে এই তামাচাবাজীৰ সুবিধা আৰু অসুবিধা দুয়োটাই আছে। সুবিধা এইটো যে তামাচাৰ জালত প্ৰজাই মূল সমস্যা পাহৰি যায়। আৰু অসুবিধা এইটোৱেই যে তামাচা সদায় নতুন দেখুৱাবলগীয়া হয়!
১০ জুন, ২০২৩
No comments:
Post a Comment