তিনিবাৰৰ বিদায়

মূলঃ নাৰ্গেছ মহম্মদী

অনুঃ বিতোপন গগৈ

তিনিবাৰৰ বিদায় আৰু এবাৰৰ বিচ্ছেদ,

তিনিবাৰ মৃত্যুৰ দৰে

যেতিয়া আলী আৰু কিয়ানাৰ বয়স আছিল

মাত্ৰ চাৰে তিনি বছৰ

সেই সময়তে নিৰাপত্তাৰক্ষীয়ে মোৰ ঘৰ আক্ৰমণ কৰি মোক গ্ৰেপ্তাৰ কৰিছিল,

তেতিয়া কিয়ানাৰ এটা অস্ত্ৰোপচাৰ হৈছিল

আৰু মই ঘৰলৈ অহাৰ মাত্ৰ কেইটামান ঘণ্টা।

তাইৰ জ্বৰ উঠি আছিল

নিৰাপত্তাৰক্ষীয়ে যেতিয়া ঘৰটোৰ তালাচী চলাই আছিল, তেওঁলোকে ল’ৰা-ছোৱালী দুটাক

শুৱাবলৈ অনুমতি দিছিল।

মই আলীক দুভৰিৰ ওপৰত বহুৱাই ল'লো, আৰু ঝুলনা খেলাই দিলো, আৰু মৰম কৰি দিলো

আৰু তাক এটা নিচুকনি গীত শুনালো,

টোপনি গৈছিল সি

কিয়ানা অস্থিৰ হৈ আছিল। তাইৰ গাটো গৰম হৈ আছিল আৰু শংকিত হৈছিল।

তাই ভয় খাইছিল

তাই দুবাহুৰে মোৰ ডিঙিত সাৱটি ধৰিছিল

আৰু মই, যেন লাহে লাহে ডুবি গৈ আছিলো,

তাই পৰা আঁতৰ হৈ গৈছিলো

যেতিয়া মই ঘৰৰ পৰা ওলাই চিৰিৰে নামি আহিছিলো

কিয়ানা দেউতাকৰ কোলাত কান্দি কান্দি ৰৈ গৈছিল

তাই মোক তিনিবাৰ উভতাই মাতিছিল

মই তিনিবাৰ ঘূৰি আহি তাইক চুমা খাইছিলো।

যেতিয়া আলী আৰু কিয়ানাৰ বয়স পাঁচ বছৰ আছিল, আৰু সিহঁতৰ দেউতাক আমাৰ পৰা আঁতৰত

ফ্ৰান্সত আছিল,

নিৰাপত্তাৰক্ষীয়ে মোৰ দেউতাৰ ঘৰত আক্ৰমণ কৰিলে

আৰু মোক গ্ৰেপ্তাৰ কৰিলে,

আলীয়ে নিজৰ হালধীয়া প্লাষ্টিকৰ বন্দুকটো ওলিয়াই ল'লে

আৰু মোৰ চাৰ্টৰ আস্তিনত ধৰি ল'লে

আৰু কিয়ানা, ধুনীয়া চোলাটো পিন্ধিয়ে,

মোৰ ফালে দৌৰি আহিল, আৰু মোৰ স্কাৰ্টৰ

কাষৰিত ধৰিলে

সিহঁত মোৰ লগত আহিব বিচাৰিছিল,

সিহঁতৰ কৰুণ চকু দুযোৰ দেখি মই নিজৰ আৱেগ নিয়ন্ত্ৰণ কৰিব পৰা নাছিলো।

সিহঁতৰ সৰু সৰু হাতকেইখন মোৰ চোলাৰ পৰা

আঁতৰাই দিলোঁ

আৰু শিল হৃদয়ৰ মানুহবোৰৰ গাড়ীত উঠি গুছি গ'লো।

আলী আৰু কিয়ানা যেতিয়া চাৰে আঠ বছৰীয়া হৈছিল, ৰাতিপুৱা সিহঁতক মই স্কুল যাবলৈ সাজু কৰি দিছিলো

আৰু সিহঁত ওলাই গৈছিল,

নিৰাপত্তাৰক্ষীয়ে পুনৰ মোৰ ঘৰ আক্ৰমণ কৰিলে,

এইবাৰ আলী আৰু কিয়ানা ঘৰত নাই।

কিতাপৰ আলমাৰীৰ পৰা সিহঁতৰ ফটোখন হাতত ল’লোঁ

আৰু চুমা এটা খাই বিদায় ল'লো

আৰু সিহঁতৰ গাড়ীৰ ফালে আগবাঢ়িলো

যাৰ কোনো দয়া-মায়া নাছিল

আৰু এতিয়া ২০১৭ চনৰ ছেপ্টেম্বৰ মাহ

আঢ়ৈবছৰ হ'ল মই সিহঁতক নেদেখা

হয়তো লেখাৰে মই প্ৰকাশ কৰিব পৰা নাই,

কিন্তু অনুভৱ কৰাব পৰা নিশ্চয়তা আছে– সমগ্ৰ ইতিহাসৰ মাবোৰৰ যন্ত্ৰণা,

যিসকল মায়ে এফালে নিজে দোষী সাব্যস্ত হোৱাক লৈ গৌৰৱ কৰে, আৰু আনফালে সেই দোষী সাব্যস্ততাই নিজৰ সন্তানক বুকুৰ পৰা কাঢ়ি নিয়াৰ যন্ত্ৰণাত চটফটাই থাকে।

ছেপ্টেম্বৰ, ২০১৭

এভিন জেল, ইৰাণ

(২০২৩ বৰ্ষৰ শান্তিৰ ন'বেল বিজয়ী নাৰ্গেছ মহম্মদীয়ে জেলত থকা অৱস্থাতে লিখা কবিতাটো)

৭ অক্টোবৰ, ২০২৩